KALIBO, Aklan—Nagapabilin nga manaba eon ro kaso it covid-19 sa bilog nga probinsya it Aklan sa nagtaliwan nga mga inadlaw.

Kahapon kat nakalista eamang it 29 nga kaso ro Aklan Provincial Epidemiology Surveillance Unit it Provincial Health Office halin sa 75 ka mga swab samples nga gintest sa laboratoryo nga nahamtang sa provincial hospital.

Sa nasambit nga numero, tig-lima ro maghalin sa banwa it Banga ag Kalibo; an-om sa Batan; tig-sambilog maghalin sa munisipalidad it Ibajay, Lezo, Madalag ag Malinao; daywa sa Makato; ap-at sa Malay ag tatlo sa Numancia.

-- Advertsement --

Angot kara, nagaabot eon sa kabilugang 12,237 ro kumpirmadong kaso nga nailista sa Aklan apang, 11,609 eon man ro nagmayad kara matapos nga nagpaidaeom sa pagbueong ag quarantine procedure.

Sa makaron hay 318 eon lang ro ginamonitor nga aktibong kaso it mga tinamaan it deadly virus nga ginakaeakipan it 223 nga una facility quarantine; 52 nga naka-home quarantine ag 43 ro admitted.

Samtang, kapin sa 310 man ro mga binawian it hueam nga kinabuhi bangud sa nasambit nga pandemya.