KALIBO, Aklan—Aminado ro lokal nga gobyerno it Kalibo nga mabahoe nga hangkat kanda ro manana nga numero it mga gustong makabaton it bakuna kontra coronavirus disease (COVID-19).

Angot kara,  ginhinyu ni  Dr. Jocelyn Garcia, OIC it  Municipal  Health Office  ro bulig it media agud nga makatau it tama nga impormasyon angot sa bakuna.

-- Advertising --

Nagpahayag man it kahauman sanday Kalibo Mayor Emerson Lachica ag Vice Mayor Cynthia Dela Cruz nga mauna sa mga pagaturukan it bakuna agud nga mapataas ro kumpiyansa it publiko.

Sa pihak nga parte, ro vaccination site para sa mga taga Barangay Estancia, Tigayon, New Buswang,  Pook,  Caano, Mabilo,  Nalook, Briones ag portion it Poblacion, Kalibo  hay sa covered court it Kalibo Pastrana Park.

Ro mga magapabakuna sa covered gym it Aklan Catholic College hay ro mga residente it Brgy. Andagao, Old Buswang, Bakhaw Sur, Bakhaw Norte,  Linabuan Norte,  Tinigao, Mobo ag portion it Poblacion.

Nagaeaum si Dr. Garcia nga maga-abu pa ro mga magapalista nga naeakip sa mga prayoridad nga pagabakunahan.

Ginpasiguro man it LGU-Kalibo nga haum eon sanda sa pag-umpisa it vaccination drive.

Nakataeana man sigon nga pagahiwaton ro simulation exercise  sa unang domingo it marso  bilang pagpahaum  sa rollout it bakuna halin  sa pag-biyahe kara paagto  sa storage facility, pagpanupod ag pagpatigayon it pagbakuna ag pagbilog it team nga maga-monitor it kahimtangan ag mga magiging epekto sa mga mabakunahan.

Ro munisipyo hay nagtaeana it kapin sa PP50 million pesos sa pagbakae it  bakuna.

Dugang pa ni  Garcia nga sa masunod nga mga inadlaw hay magapaidaeum man sa  vaccination training ro mga health care workers, kun sa siin sanda man ro magapanguna sa listahan it mga pagataw-an it  bakuna.

Magiging kabulig sigon nanda kara ro Department of Health.

Bangud nga magiging kanugon ro bakuna kun indi magasipot sa nakataeanang oras ro pagabakunahan, nagapahaum man sanda it back up  nga listahan sa mga vaccination site.

Boses ni Dr. Jocelyn Garcia, OIC it MHO-Kalibo