KALIBO, Aklan—Nakalista it limang bag-ong kaso it Delta variant it COVID-19 sa probinsiya it  Aklan, base sa resulta nga ginpaguwa it Philippine Genome Center pinaagi sa Provincial Health Office (PHO)-Aklan ko  Setyember 14, 2021.

Tatlo sa mga pasyente hay naghalin  sa banwa it Banga samtang ro sambilog pa hay taga banwa it Ibajay nga puro nagmayad eon.

Binawian man it anang kabuhi ro sambilog pang pasyente nga 58-anyos nga eaeaki nga taga-Ibajay bangud sa komplikasyon sa sakit.

Insigida man nga gin abisuhan it PHO-Aklan ro natungdan nga local government units  nga magpatigayon it  contact tracing sa mga nakasalumha it limang kumpirmadong kaso it Delta variant.

Sa kabilugan,  naga-abot eon sa  27 ro kabilugan nga numero it mga kaso it Delta variant sa Aklan.

-- Advertsement --

Padayun man nga nagapanawagan  ro  PHO ag lokal nga gobyerno  sa mga residente nga  magsunod sa health protocols ag magpabakuna.

Ko Setyembre 12,  nakalista man ro Department of Health Western Visayas it ap-at nga  kaso it Beta variant, tatlong kaso it Theta variant ag sangka kaso it Alpha variant sa Aklan.