Kalibo Aklan ——-Ginkumpirma it Land Transportation Office (LTO) Aklan nga nag-umpisa eon ro libreng enrollment para sa 15-hours Theoretical Driving Course sa LTO Driver’s Education Center.

Apang, raya hay applicable pa eamang sa LTO Regional Office 6 sa siyudad it Iloilo.

-- Advertising --

Suno kay Engr. Marlon Velez, head it LTO-Aklan nga halin ko buean it Setyembre it nagtaliwan nga dag-on kat nadugangan ro requirements sa pagbuoe it student permit partikular ro 15 hours nga Theoritical Driving Course hay insigidang nagtukod ro LTO Regional Office it sangka division nga Driver’s Education Center.

Tuyo sigon kara nga makabulig sa mga motorista nga gustong magbuoe it student permit.

Angot kara, pagatinguhaan man sigon ni Engr. Velez nga maumpisahan eon ro implementasyon kara sa probinsya it Aklan.

Sa kamatuoran suno kana hay nagpadaea imaw ko nagtaliwan nga Disyembre it ap-at nga tawuhan it LTO-Aklan sa Regional Office para maging lecturer.

Haum eon  man suno kana ro pasilidad ag mga lecturer sa opisina it LTO-Aklan kung siin ginahueat eon lang nanda ro igatao nga authority it Regional Office para maumpisahan eon ro implementasyon it nasambit nga proyekto.

Nasayuran nga naga-abot sa 2,000 hasta 2,500 pesos ro pagabayaran sa mga accredited driving school sa pagbuoe it 15-hours Theoretical Driving Course.