KALIBO, Aklan—Ginpaathag ni Executive Assistant to the Mayor Mr. Basil Tabernilla nga nagbaeay it sangka COVID-19 Vaccine Working Committee ro lokal nga gobyerno it Kalibo.

-- Advertising --

Raya hay sandig sa ginpagguwa nga Executive Order No. 006 Series of 2021 ni Kalibo Mayor Emerson Lachica kahapon nga adlaw it Lunes, Enero 18.

Suno kay Tabernilla, tuyo kara nga makaangkon it komitiba nga magapanguna sa pagdumaea it bakuna engkaso nga maging available eon raya sa nasyon.

Ro pagtukod sigon kara hay bilang preparasyon para sa procurement, distribusyon ag transportasyon it COVID-19 vaccine.

Natueopangdan nga nagtaeana it initial funding ro LGU nga kapin sa 50 million pesos para sa pagbakae it bakuna.

Ro pondo sigon ngara hay maghalin sa funding allocation it munisipyo.

Tuyo it LGU nga mabakunahan ro kapin sa 86,000 ka mga pumueoyong Kalibonhon kontra COVID-19 kung siin prayoridad nga unang maturukan ro mga frontliner, senior citizen ag pigadong residente.