KALIBO, Aklan—Gin-turnover eon it lokal nga gobyerno it Kalibo ro kapin sa napueo nga unit it body-worn cameras sa Kalibo Municipal Police Station.

Suno kay Mayor Emerson Lachica nga posible pang madugangan ro nasambit nga mga unit nga iga-donar it LGU sa mga kapulisan.

Ginpabugae pa ni Lachica nga kompleto ro andang gintao nga body camera bangud may una rayang charger ag memory card.

Suno sa alkalde, mabahoe ro maibulig kara sa mga ginapatigayun nga operasyon it mga otoridad.

Sa rayang pamaagi hay makita ro  matuod nga natabo eabi eon sa pagserbi it mandamiento de aresto ukon search warrant kung siin malikawan eon ro pag-abuso it mga pulis sa andang trabaho kamana man sa mga kriminal nga ginabaliskad ro sitwayson para ibutang sa aeang-aeang ro mga law enforcement agency.

-- Advertsement --

Mabahoe man sigon ro maibulig it video footage it body cam sa pag-file it kaso kamana man nga malikawan ro alegasyon nga planted ro ginkasa nga operasyon.

Mag-eowas kara, mabahoe man ro pakinabang it body cameras para wakasan ro mga pag-eabag sa tawhanong kinamatarong.

Sa makaron, ro Kalibo Municipal Police Station pa eamang ro naga-isaehanon nga estasyon it pulisya nga may body cameras sa bilog nga probinsya it Aklan.

Boses ni Kalibo Mayor Emerson Lachica

Sa pihak nga parte, nagaeaum man si Mayor Lachica nga masabat ro anang ginpadaea nga letter of appeal sa Sangguniang Bayan it Kalibo angot sa gina-loan it LGU nga masobra P691 million sa Development Bank of the Philippines.

Nasayuran nga nakasueod sa nasambit nga kantidad ro pilang ka mga proyekto it banwa.

Boses ni Kalibo Mayor Emerson Lachica