Kalibo Aklan ———–Haum si  konsehal  Jocel Maximo  it Barangay Odiong , Altavas nga sabton ro anuman nga alegasyon nga ginahaboy kanda it pamilya Benedicto .

Aminado ro opisyal  nga sambilog  imaw sa mga gintawagan it pamilya agud nga pangayuan it bulig nga madaea ro andang pasyente sa ospital nga manug-unga.

Bangud nga bukon it available ro andang on-call nga driver,  gin-turo sigon nana ro mga raya nga magpaeapit kay Kapitan agud nga magamit ro patrol it barangay, apang nasayuran nana ko ulihi nga  owa man sanda nag-agto .

Samtang,   mabahoe sigon nga kasamaran kanda nga mga Barangay official ro gin-post nga mga  pamisaea ag mga litrato sa social media nga nagapakaeain  kanda  eabi eon ro alegasyon nga ginagamit sa personal nga bagay ro andang Barangay patrol imbes sa emergency nga sitwasyon.

Sa pihak kara, nagapabilin sigon nga malimpyo ro andang konsensiya bangud nga gina-obra man nanda ro andang obligasyon.

-- Advertsement --

Madumduman nga naging kontrobersiyal ro isyu matapos nga ginboe-an it litrato ro Barangay patrol nga may kargang mga semento halin sa baeay ni kapitan arnaldo palomo paagto sa fishing port .