Kalibo Aklan ——–Kumpiyansa ro mga kaalyado ni dating Kalibo Mayor William Lachica nga magadaog raya sa nagahilapit nga eleksyon sa 2022.

Raya hay kasunod it kumpirmasyon  it dating alkalde  nga uman nga magapadaeagan bilang Gobernador.

-- Advertising --

Suno kay Sangguniang Panlalawigan Member Atty. Harry Sucgang nga  posibleng maka-tandem ni Lachica si Board Member Emmanuel “nolly” Sodusta.

Nagpahayag eon man suno kana  it interes nga maging representante it kongreso sa 2nd District ukon Western side si dating Makato Mayor Jun Legaspi,  ag owa pa it napilian nga kandidato sa eastern side .

Samtang, gindugang pa ni Atty. Sucgang nga sa makaron hay owa pa it kumpirmasyon ro napabalitang  makikipag-sanib-pwersa kanda si  dating Vice Governor Billie Calizo-Quimpo.

Raya hay may posibilidad suno kana bangud nga dati man nanda raya nga kaalyado, apang owa pa raya naistoryahan it andang grupo.

Nagapati man imaw nga haeos 80 porsiyento ro andang winnability sa eleksyon kon magsueod kanda si Calizo-Quimpo .

Nauna eon nga napabalita nga nakaangkon it owa pagka-ilintindihan sa partidong tibyog-akean matapos nga matunog makaron ro pangaean ni Ibajay Mayor Jo-en Miraflores nga magabueos sa anang amang si Governor Florencio Miraflores imbes nga si Vice Governor Reynaldo “boy” Quimpo ro magasaka sa nasambit nga posisyon.