KALIBO, Aklan—Nagaeaum ro batikang abogado sa Aklan nga may magasunod sa tapak ni dating congressman  Godofredo “Goding”  P. Ramos nga kilaea sa tawag nga ama it Akean.

Suno kay Atty. Plaridel Morania nga naging  huwaran ro kaaeam ag kahugod ni  Ramos.

Ginpabugae pa kara nga imaw ro nag-author it resolusyon sa Sangguniang Panlalawiganagud nga madeklara ro makaron nga petsa kada dag-on,   Nobyembre  8  bilang  Godofredo Ramos Day.

Nasayuran nga ko dag-on 2002 kat gindeklarang Special Non-Working Holiday sa bilog nga probinsya ro kada petsa 8 it Nobyembre, kun  sa siin  raya hay nakabaehag sa Proclamation No. 194 bilang pagdumdum sa kaadlawan it  Ama it Aklan.

Gindugang pa ni Atty. Morania nga ro makasaysayan nga pagpirma kara  ni dating pangueong Gloria Macapagal Arroyo hay natabu  sa isla it Boracay sa annag pagbisita idtu.

-- ADVERTISEMENT --

Si Ramos hay natawo ko Nobyembre 8, 1911.

Ginkilaea imaw bilang Ama it Aklan bangud sa anang pagtinguha  nga kilaeahon  ro probinsiya  bilang  separadong probinsiya halin sa Capiz nga dati  kara nga ginaeakipan nga probinsya.

Ro pagbueag it Aklan halin  sa Capiz hay nakabaehag sa Republic Act 1414 nga anang ginpasa sa  Kongreso.

Sa  pihak it mga pagtinguha  it mga naunang nagdumaea sa probinsiya,  si Ramos eamang ro naging madinaeag-onm.

Raya  hay owa naging  maeumo para kay  Goding bangud nga inabot it  55  anyos  ro anang pakikipagsukoe  agud nga maangkon ro ginahandum nga kahilwayan.