KALIBO, Aklan—Ginakalipay makaron it mga opisyales it Barangay Calimbajan, Makato ro madasig nga pag-aksyon it Department of the Interior and Local Government (DILG) Regional Office sa andang reklamo angot sa proyektong farm to market road sa andang barangay.

Suno kay Punong barangay Elynel Gallardo it Calimbajan, Makato nga una nandang gindangop ro reklamo sa Sangguniang Bayan kung siin nagbilog sanda it sangka resolution.

Ko nagtaliwan nga dominggo suno kana hay nagpatigayun it inspeksyon ro mga tawuhan it DILG-6 sa lugar para ma-usisa ro kaundan it proyekto.

-- ADVERTISEMENT --

Nagaguwa sigon sa findings it taeatapan nga naga-abot pa sa 180 meters ro dapat isugpon sa nasambit nga farm to market road project.

Bangud kara, gintaw-an sigon it DILG ro Municipal Engineering Office it hasta Disyembre 15 para ma-comply ro kueang.

Madumduman nga naging kontrobersyal ro nasambit nga proyekto bangud sa pagiging substandard ag owa it nagakaigo nga koordinasyon sa barangay.