KALIBO, Aklan—Ginkalipay it mga miyembro it Federation of Kalibo Tricycle Operators and Drivers Association Inc. ukon FOKTODAI ro ginpatigayun nga distribusyon it bulig pinansiyal halin sa Assistance to Individuals in Crisis Situation (AICS) program it Department of Social Welfare and Development (DSWD).

Suno kay FOKTODAI president Johnny Damian, makabig nga madinaeag-on ro distribusyon it ayuda bangud natapos raya sa sueod eamang it sang adlaw.

Ro DSWD sigon ro nag-identify it mga recipient nga kwalipikadong magbaton it 3,000 pesos nga cash assistance.

-- ADVERTISEMENT --

Nasayuran nga naga-abot sa  3,000  nga mga indigent families ag individual members halin sa nagkaeain-eain nga Tricycle Operators and Drivers Association ukon TODA sa banwa it Kalibo ro nakabaton it bulig pinansyal.

Bangud sa kaabuon it natumod nga benepisyaryo hay  nagtaeana it daywang venue partukular sa Kalibo Pilot Elementary School ag   Covered Court it Brgy. Andagao.

Samtang, may pila man nga na-disqualify bangud natukiban nga nakabaton eon sanda it ayuda halin sa ibang programa it gobyerno pinaagi sa DSWD.

Sa pihak nga parte, ginklaro ni Kalibo Sanguniang Bayan member Matt Aaron Guzman, Chairman it Committee on Transportation nga ro kwartang ginpanupod sa nagkaeain-eain nga Tricycle Operators and Drivers Association ukon TODA hay personal nga gindaea it mga respresentante halin sa DSWD-VI.

Raya sigon hay kaparte it anang ginpangayo nga bulig sa opisina ni Senator Chistopher “Bong” Go para mabuligan ro mga tricycle driver bangud sambilog sanda sa mga eubus nga naapektuhan sa pagpanaeasa it pandemya.

Nagapati ro opisyal nga mabahoe nga bulig ro gintao nga kantidad sa nasambit nga sektor.