KALIBO, Aklan—Nagahinyu ro Department of Tourism nga unahon nga mabakunahan ro masobra sa 40,000 nga tourism workers sa isla it  Boracay agud nga mas pa nga magtaas ro kumpiyansa it mga turista.

Suno kay Tourism Secretary Bernadette Puyat nga ro nasambit nga request hay padayun nga naka-pending sa Inter-Agency Task Force on Emerging Infectious Diseases (IATF-EID).

-- Advertising --

Raya hay kasunod it pag-arangkada it pagbakuna sa mga A4 group.

Aminado man ro sekretaryo nga sa makaron hay indi pa nanda matumod kon hin-uno magabalik ro kabaskog it  tourism industry kapareho it pre-pandemic levels bangud sa mga nagatuhaw nga mga bag-ong variant it covid-19.

Nag-request sigon sanda it 80,000 doses it bakuna para sa 40,000 nga trabahador sa Boracay.

Ginkumpirma pa kara nga ro Crimson Hotel sa isla hay nag donar it  5,000 doses it bakuna ag nagaeaum nga maabu pang stakeholders ro magapahayag it interes nga  magatau man it donasyon.

Samtang,  ginaduso makaron it DOT ro ginaproponer nga  green lane para sa mas madasig ag hassle-free nga pagbiyahe it mga turista sa mga tourist destinations sa nasyon  eabi eon kon bilog nga pamilya ro kaibahan.

Nauna kara nag hinyu man sigon sanda it travel access para sa mga naga-edad it 65 anyos ag 18 anyos panaba nga fully vaccinated eon.

Ro green lane hay kaparte suno kana it  pagtinguha it gobyerno nga uman nga mabuksan ro ekonomiya ag makabalik sa trabaho ro mga tourism workers.

Gina proponer man it DOT ro pag gamit it unified travel pass ukon  vaccination card  pinaagi  sa crypto code  agud nga malikawan nga ma-peke.