KALIBO, Aklan—Ginaeuman it   Department of Environment and Natural Resources (DENR) nga matapos nanda sa buean it mayo ro nagapadayun nga  rehabilitasyon sa isla it Boracay.


Suno  kay Environment Secretary Roy Cimatu nga kumpiyansa ro anang ginapamunuan nga  Boracay Inter-Agency Task Force nga matapos  ro andang mga target  sa gintaeana nga tiempo antes pa man nga mag-expire ro andang termino makaron nga dag-on.

-- Advertising --

Ginpatigayon  it  gobyerno  ro  rehabilitasyon  sa boracay ko  2018  matapos raya nga ginbansagan ni pangueong Rodrigo duterte nga  cesspool.

Ginsarado ro isla  sa mga turista  sa sueod it 6 nga buean agud nga taw-an it daean ro paglimpyo  ag rehabilitasyon.

Apang nagapadayun pa ro pag-ayos it mga karsada ag drainage system kat buksan  ro isla ko oktubre 2018.


Sa  2020 year-end report it  Boracay Inter-Agency Rehabilitation Management Group (BIARMG), ro implementing arm  it  task force,  nagnaba eon lang  sa 342 ro numero it mga istraktura nga naga-eabag  sa  easement rules.


Raya hay haeos 1/5 it kapin  sa  1,570 nga  illegal structures nga natumod  sa isla.

Kaabuan sa mga istraktura nga ginaeakipan it  commercial establishments ag mga  residential houses, hay nakasueod sa 12-meter road easement,  samtang ro masobra sa 330 nga establisimento  hay  nakasueod  sa beach easement nga may limitasyon nga  25+5 meters.

Gindugang pa nga ro  masobra sa  970 nga istraktura  ukon 79 percent hay naka-comply eon  sa  12-meters road easement rule samtang ro  90  nga establisimento hay  nagapabilin nga noncompliant sa beach easement limit.