KALIBO, Aklan—Maabo ro nagkanugon matapos nga uwa nakatambong sa dag-unan nga  pagpaiwag ukon Christmas lighting ceremony sa Kalibo Pastrana Park ukon mas kilaea sa tawag nga “Iwag it Kalibonhon”.

Raya hay kasunod it pagsekreto it lokal nga gobyerno it Kalibo sa petsa it pagpahayag sa higanteng Christmas tree ag iba pang dekorasyon nga makit-an sa public plaza.

Nauna eon nga ginpahayag ni Kalibo Mayor Emerson Lachica nga pagahimuon raya nga virtual agud nga malikawan ro pagbuhos it mga  tawo  bangud sa covid-19 pandemic.

-- ADVERTISEMENT --

Apang, maabo gihapon ro nakasaksi kara matapos nga haeos adlaw-adlaw hay maabo eon ro nagapamasyar sa pastrana park halin kat ginpaidaeom sa alert level 2 ro bilog nga probinsya it Aklan kon sa siin pwede eon makaguwa ro mga onga ag senior citizen eabi eon ro mga bakunado kontra sa deadly virus.

Madumduman nga kaeabanan nga  ginapatigayon raya kada Disyembre 1  apang makaron hay uwa gin-eksakto sa nakasanayan nga petsa bangud sa mga limitasyon  nga tuga it pandemya.

Sa makaron hay mabatyagan eon ro espiritu it paskwa sa bilog nga banwa it Kalibo bangud sa mga multi-colored lights sa mga puno it kahoy ag mas bongga nga paiwag sa mga nagkaeain-eain nga dekorasyon nga nagasimbolo it pag umpisa it  masadya nga holiday tradition sa kapital nga banwa it probinsya it Aklan.