KALIBO, Aklan—Ginpatag-od eon ro curfew hours sa bilog nga probinsiya it Aklan umpisa makaron nga adlaw it Martes, Oktubre  26.

Sa ginpaguwa nga  advisory ni Aklan Governor Florencio Miraflores, alas-9 eon it gabi-i ro umpisa it  curfew hasta alas-4 it aga-aga halin  sa dating 8pm to 4am.

Mag-eowas sa pagpatag-od it curfew, ginapasugtan man nga magbukas ro mga establisimento  umpisa alas-6 it agahon  hasta alas-8 it gabi-i.

Raya hay base sa patakaran sa idaeum it general community quarantine ukon GCQ  sandig sa memorandum circular no.  2021-028  it Department of Trade and Industry  ukon  DTI.

Sa pihak nga parte, kasunod it paghaeuga it patakaran  para sa mga turista nga magahalin  sa isla it panay kaibahan ro probinsiya it  guimaras,   ginklaru ni governor miraflores nga indi eon kinahangean nga magpakita  it  negatibong  RT-PCR test result.

-- ADVERTISEMENT --

Apang kinahangean nga ro mga biyahero hay fully vaccinated.

Dapat sigon  nga ipakita ro vaccination certificate halin sa vaxcert.doh.gov.ph imbes nga  negative RT-PCR test result, 72 oras antes ro pagbiyahe.