KALIBO, Aklan—Temporaryong sarado ro border it Japan umpisa kaina it tungang gabi-e nga magabuhay sa sueod it sang buean bilang pangaman sa covid-19 omicron variant nga unang nadiskubre sa nasyon it South Africa.

Suno kay Bombo International Correspondent Josel Palma it Japan, mag-eowas sa 14 ka mga nasyon ag rehiyon, gin-eakip eon man sa listahan ro Britanya ag Germany nga kon sa siin ro mga returning Japanese citizens ag foreign residents hay magapaidaeom sa striktong quarantine requirements.

Ginpahayag dugang ni Palma nga ro nasambit nga direktiba hay gin-anunsyo mismo ni Japanese Prime Minister Fumio Kishida agud nga makapangaman ro nasyon sa ginaeauman nga worst-case scenario nga epektibo it bag-ong variant it deadly virus.

-- ADVERTISEMENT --

Sa pihak nga parte, umpisa sa adlaw it Miyerkules, Disyembre uno hay pagalimitahan sa 3,500 katawo kada adlaw ro pwedeng makasueod sa nasambit nga nasyon kon sa siin ro mga travelers nga maghalin sa South Africa ag mga kaeapit nga pungsod hay magapaidaeom sa napueong adlaw nga isolation.

Samtang, ginklaro ni Palma nga haom ro nasyon sa panibag-ong paeag it pandemya bangud nga ro bag-ong elected nga Prime Minister hay gintaw-an kara it inugtaeopangod ro health care system it Japan.

Partikular sigon nga ginpasanyog ro kapasidad it mga ospital ag ro mga health care authorities.

Nasayuran nga ko Nobyembre 8 eamang nagbukas ro mga eskwelahan ag negosyo sa Japan apang makaron hay nakataeana eon man raya nga pagasaraduhan bangud sa paeag it omicron variant.