KALIBO, Aklan—Nagapangatubang  sa kasong homicide ag frustrated homicide ro sangka barangay tanod matapos nga mabuno-patay ro sangka binatilyo  ag manihan ro daywang iba pa sa andang owa pagka-ilintindihan kabi-i sa Brgy. Mataphao, New Washington.

-- Advertising --

Suno kay P/Corporal  Eduardo Almerante it New Washington municipal police station nga base sa andang inisyal nga imbestigasyon,  samtang nagapauli ro tanod nga si Ruben Dial, 45-anyos,  residente it nasambit nga lugar halin sa sangka namatyan hay nasub-eang nana ro mga biktima nga si Angelo Rencio alyas “Mokong” 17-anyos nga imaw ro gindeklarang dead on arrival sa Aklan provincial hospital ag ro mga naninahan nga sanday Rian Rencio, 23-anyos tiyo it namatay ag alyas  John,  17-anyos.

Nagboluntaryo sigon ro mga biktima nga ihatud pauli ro suspek matapos mataeupangdan nga una raya sa impluwensiya it makahieilong nga ilimnon.

Ginbuslahan sigon it biktimang  si Angelo si Ruben angot sa pagpang-gubat kara sa andang pamilya ko una  rason nga nakaangkon it mainitang diskusyon.

Nagresulta sigon raya sa komosyon nga nauli sa pagbuno it suspek sa biktima nga tinamaan sa anang dughan.

Bangud sa patal nga lastro,  patay eon raya kat maka abot sa ospital  samtang nakaagum man it igo si Rian sa ilokon nga nagapamayad makaron sa ospital  ag si alyas John nga may daplis it pagbuno nga insigida man nga gin-refer sa out-patient department  matapos nga taw-an it paunang pagbueong.

Nasayuran nga nakaangkon man it mga  gaob sa nagkaeain-eain nga parte it eawas ro tanod kat ginkabuligan raya nga dumugon it mga pumueuyu agud nga maagaw ro siyaw matapos nga mapan-uhan nga ginbuno nana si Angelo.

Nasayuran nga dati eon nga may banggi-anay  ro pamilya it magtimbang nga parte.

Narekober it mga otoridad ro siyaw nga gingamit  sa krimen.

Ro suspek hay presente makaron nga naka-hospital arrest.