KALIBO, Aklan—Pabor ro pamunuan it Bureau of Fire Protection (BFP)-Kalibo nga armasan ro mga bumbero matapos nga pirmahan eon ni Pangueong Rodrigo Duterte ro Republic Act (RA) 11589 ko nagtaliwan nga adlaw.

Nagapati si Fire Senior Inspector Joseph Cadag it BFP-Kalibo nga makatao raya it dugang nga proteksyon ag seguridad sa mga kaparehong bumbero sa andang ginapatigayn nga operasyon ukon pagresponde.

-- Advertising --

Raya sigon hay kaparte man it BFP modernization.

Aminado si Fire Senior Inspector Cadag nga maabo nga hangkat ro ginapangatubang it andang miyembro sa pagresponde it sunog bangud may pilang tag-ana it baeay nga nagapang-agaw it fire hose ag fire truck para unahon nga tapnaon ro kaeayo sa andang nasakupan.

Pila eamang sigon raya sa anang naging eksperyensya sa sueod it 23 anyos nga pagserbisyo bilang firefighter.

Boses ni Fire Senior Inspector Joseph Cadag

Sa pihak nga parte,  ginakabig man nga welcome development ni Sangguniang Panlalawigan member Nemesio Neron para sa sebisyo it mga firemen ro pagtao kanda it armas.

Ro mga bumbero suno kana hay kaibahan man sa uniformed personnel rason nga nagakadapat eamang nga may daea sanda nga firearms.

Nagapati si Neron nga maga-agi man sa tamang orientation ag training ro mga katapo it Bureau of Fire angot sa pagbuyot it baril kamana man nga makaangkon it kaparehong disiplina kapareho sa Philippine National Police ag Armed Forces of the Philippines.

Boses ni SP member Nemesio Neron