Kalibo Aklan ——-Epektibo Enero 20, 2021  bawae eon nga magbiyahe ro mga barotong de-katig sa Isla it  Boracay .

Suno kay  Senior Chief Petty Officer Dominador Salvino,  Deputy Station Commander it Philippine Coast Guard (PCG)-Aklan Station nga raya hay matapos nga owa eon ginpasugtan it Maritime Industry Authority  ukon  Marina ro ginapangayo nga extension it Caticlan Boracay Transport Multi-purpose Cooperative ukon CBTMPC para sa andang Certificate of Public Convenience nga nag-expire ko Enero 19, 2021 .

-- Advertising --

Ro mandu hay sandig sigon sa Memorandum Circular 2016-02  it Marina angot  sa pag-phase-out it mga barotong de-katig.

Madumduman nga nag-apela ro nasambit nga kooperatiba ag ro Sangguniang Panlalawigan may daywang dag-on eon ro nagtaliwan para sa amat-amat nga pagduea sa andang barotong de-katig it hasta sa 2023 agud nga mataw-an it daean ro pagbaylo sa andang ibang units it fiber glass nga baroto bilang kaparte it modernization program it gobyerno .

Sa makaron hay bastante pa suno kana ro 23 nga fiber glass boat nga 60-seater nga nagabiyahe it kooperatiba.

Nasayuran nga nakipagbueuligan ro  CBTMPC sa sangka banko it gobyerno agud nga maka-utang it kapin  sa  P135 million pesos sa idaeum it ‘Ferry Boat Inclusive Program’  sa pagbakae it  brand new nga fiber glass boats, kun  sa siin nagabalor ro kada sambilog it  P6.4 million  hasta  P10 million pesos.

Ro mga gin-phase out nga barotong de katig hay pwede eon lang nga magamit para sa island hopping,  sports fishing, scuba diving ag iba pang aktibidad it mga turista .