KALIBO, Aklan—Ginkumpirma ni Punong Barangay Alita Sineneng it Mataphao, New Washington nga antes nga natabu ro insidente hay nag duty pa sa andang border control checkpoint ro tanod nga si Ruben Dial.

-- Advertising --

Suno kana nga naka-istorya pa nana raya ag nag-ea-ong nga pagkatapos it duty hay magaderetso sa sangka namatyan agud nga magbantay kon nakakasunod ro mga tawo idtu sa ginapatuman nga health  protocol.

Eubus sigon ro anang pagkakibot matapos nga makabaton it radio message nga may natabu nga stabbing incident kun sa siin eakot ro anang sambilog sa mga tanod nga si Dial, nga insigida man nga gin respondehan it mga kapulisan.

Nagapati si kapitan nga posibleng bangud sa datng tima-tima it andang pamilya ro ugat it krimen.

Nag apela man imaw sa magtimbang nga parte nga indi pag ibutang sa andang mga alima ro hustisya agud nga indi eon mag-grabe pa ro sitwasyon.

Samtang,  ginhambae sigon kana it tanod nga owa imaw naka-inom ag gin-eambangan ag ginkabuligan nga bugbugon it mga biktima samtang nga nagapauli halin  sa namatyan.

Depensa sigon kara nga self-defense ro anang gin-obra.

Mag-eowas kara, naka duty imaw ag may liquor ban rason nga indi pwedeng mag-inom.