Kalibo Aklan ———–Nagaeaum ro Barangay council it  Agbanauan, Banga  nga  mataw-an eon it aksyon it Provincial Engineering Office (PEO)  ro andang mabuhay eon  nga problema nga eubak-eubak nga karsada.

Suno kay Kagawad Joey Cuenco nga  ro nasambit nga provincial road hay naga-konekta man sa Barangay Libas ag Polocate.

Maabu sigon nga mga residente ro nagareklamo kanda bangud sa mabudlay nga  transportasyon, kun  sa siin haeos  motorsiklo ag tricycle eamang ro makasarang nga makasueod.

Kon tag-uean suno kana hay problema nanda ro maeasa  ag malubak nga daean  ag kon  tig-ilinit man hay masyadong maalikabok .

Nagbayanihan  man sigon ro mga drivers  ko nagtaliwan nga buean agud nga matambakan it baeas ro daean,  apang uman nga nagabalik ro problema.

-- ADVERTISEMENT --

Gindugang pa  it opisyal nga kabay nga mataw-an it katumanan ro pagsemento sa andang karsada sa masunod nga dag-on matapos nga ginasugid nga may nakataeana eon nga budget para kara.

Samtang, sangka resolusyon sigon ro ginpasa it andang konseho agud nga  mag-request  nga temporaryo anay nga ma-grader  ag mabaeasan  ro andang rough road.

Sa pihak nga parte,  ginpasiguro ni Engr. Moriel Macavinta it PEO-Aklan nga pagataw-an it solusyon ro  problema it nasambit nga Barangay .

Suno kana nga ro availability it mga equipment para sa pag-ayos it karsada ro nagapanguna nanda nga problema makaron.

Samtang,  posible suno kana nga sa masunod nga dag-on hay mapa-semento eon ro portion it karsada nga may nakataeana nga budget nga  3 milyon pesos.