KALIBO, Aklan—Nag-angkon it igo it pag-eabo sa anang  tuo nga alima ro  sangka  tricycle driver matapos nga makaaway ro kaparehong driver bangud sa gina alegar nga  aeagawan it pasahero sa terminal area sa Oyo Torong St. Kalibo.

Nakilaea ro biktima nga si Rubin Zubiri, 49 anyos, residente it Brgy. Carugdog, Lezo.

-- Advertising --

Base sa  report,  sa baylo nga magpaeagiw,  nagbaeos man raya  ag ginbuno ro  kaengkwentru nga si Globert Inog, 41 anyos, it Brgy. Catabana, Madalag, Aklan nga tinamaan man sa anang tuo nga alima.

Una eon sa eowas nga kahimtangan ro daywa matapos nga parehong  gindaea sa ospital.

Sa andang pag-atubang  sa Kalibo Municipal Police Station , nagkaayos  sanda nga indi eon magpasaka it kaso  ag nagpromisang indi eon mauman ro  hitabu.