KALIBO, Aklan—Ginkalipay it lokal nga gobyerno it Malay  ro insigidang pag-aksyon ni Justice Secretary Menardo Guevarra pinaagi sa pagmandu sa National Bureau of Investigation (NBI) nga imbestigahan ro mga nagapameke it Real-Time Reverse Transcription Polymerase Chain Reaction (RT-PCR) test results nga ginagamit it pilang turista  agud nga makaeusot sa isla it Boracay.

Base sa Department Order 088 nga may petsang April 23, 2021,   ginamanduan ni Guevarra ro  NBI pinaagi  sa officer-in-charge nga si  Eric B. Distor nga mag-imbestiga ag magpatigayon it case build-up sa  gina alegar nga nagapakalhit it  pekeng negatibong swab test results./

-- Advertising --

Ginsugo ro NBI nga magpatigayon it nagakaigo nga kaso kontra sa mga responsable “if evidence warrants.”

Suno kay Malay mayor  Frolibar Bautista nga  nagpangayo it  bulig ro lokal nga gobyerno it  Aklan sa DOJ sa ginpatigayon nga  pueong it  Boracay Inter-Agency Task Force ko Marso 18 agud nga mapundo eon sigon ro sindikatong naga-obra it mga pekeng test results sa isla.

Ginapatihan nga bukon eamang it mga turistang nagpakita it pekeng dokumento ro paga-imbestigahan kundi pati ro mga nagapameke  ag nagloko  ukon nag scam  sa mga turista.

Gindugang pa ni Mayor Bautista nga haeos  166 eon ro mga nadakpan nga nagagamit it pekeng RT-PCR test results nga kaabuan hay nabaeabagan  sa pag-abot  sa Caticlan Jetty Port, kun sa siin pila sa mga raya hay  ginkasuhan it falsification of public documents.

Nasayuran nga ginsampolan  it  Department of Tourism-Region 6 ro  an-um nga mga turistang halin  sa Manila nga gin-aresto ko enero  matapos nga magsumite it  pekeng negative RT-PCR results sa pagsueod sa Boracay.

Ginkasuhan sanda ko pebrero it  falsification of public documents.

Boses ni Malay mayor Frolibar Bautista