KALIBO, Aklan—Nakalista it limang patay sa sueod eamang it sang adlaw kahapon ag nadugangan it sambilog pa makaron nga adlaw it Sabado bangud sa COVID-19 ro probinsiya it Aklan.

Bangud kara,  nag abot eon sa 63 ro namatay sa probinsya bangud sa deadly virus.

-- Advertising --

Suno  kay Dr. Cornelio Cuatchon it Provincial Health Office,  sunud-sunod ro pagkamatay it mga pasyente kahapon, Hunyo 4, nga  ginaeakipan it 84-anyos nga babaye halin sa Banga.

Binawian raya it anang hueam nga kabuhi  bandang alas-12:49.

Bandang alas-3:34 it hapon hay namatay man ro 75 anyos nga eaeaki nga residente it banwa it Numancia; ginsundan raya it 50-anyos bandang  alas-3:52 ag sangka 45-anyos nga eaeaki nga puro taga banwa it ibajay ag ro pinaka-ulihi hay ro sangka  57-anyos nga  taga-Kalibo bandang alas-10:52 it gabi-i.

Makaron nga adlaw it Sabado hay sambilog pang taga kalibo ro nadugang sa listahan it namatay.

Presenteng nagapatigayon it  contact tracing ro mga awtoridad sa mga tawong nakasalamuha it nasambit nga mga  pasyente.

Dugang pa ni Cuachon, raya ro pinakamaabung numero it namatay sa Aklan umpisa nga magtuhaw ro pandemya.

Samtang, sa record it Provincial Epidemiology and Surveillance Unit it Provincial Health Office, 344 ro active cases it COVID-19 sa probinsya it Aklan,  kaibahan kara ro 48 nga bag-ong nadugang.

Padayun man ro pagpadumdum it mga awtoridad nga ipabilin ro pagsunod sa mga health protocols kapareho it pagsuksok it face mask ag face shield, paghugas it alima ag social distancing.