KALIBO, Aklan—Naka-red alert makaron ro 50 ka mga estado it Amerika bilang pagpahaum sa nagahilapit nga oath taking ni President-elect Joe Biden sa maabot nga adlaw it Miyerkules, Enero 20.

Suno kay Bombo International Correspondent Juliana Olmetti it Chicago, Illinois nga gwardiyado makaron it mga soldadong Amerikano si Biden bilang pagdahan sa posibleng uman nga pag-eusob it mga ralyista.

-- Advertising --

Suno kana, gin-warningan eon sigon it FBI ro tanan nga estado it Estados Unidos nga maging alerto agud malikawan ro anumang kinagamo.

Madumduman nga gin-atake it mga supporters ni outgoing President Donald Trump ro US Capitol sa Washington DC ko nagtaliwan nga Enero 6.

Gusto sigon ni Trump nga ipagguwa nga gindaya imaw ko eleksyon rason nga gusto karang kumbinsihon si Vice President Mike Pence ag Nancy Pelosi nga baliskaron ro resulta it botohan para imaw ro ideklarang nagdaog.

Apang, kung indi sigon maging madinaeag-on ro nasambit nga plano hay pagakidnapon ag pagapatyon kara ro daywang opisyal.

Ginapatihan nga may natabo nga inside job ukon may mga Republican sa likod it pag-atake it mga taga-suporta ni Trump sa US capitol.

Nakataeana eon sigon nga umpisahan it US Senate ro impeachment kontra kay Trump sa Enero 19 kung siin magapanagatubang man raya sa pilang ka mga kaso.

Boses ni Bombo Int’l Correspondent Juliana Olmetti