KALIBO, Aklan—Pursigido ro sangka  35-anyos nga mister  nga  magpasaka it kaso kontra sa 32-anyos nga misis ag 25-anyos nga kabit kara.

Sa interview it Bombo Radyo Kalibo sa owa eon ginpangaeanan nga mister nga sangka overseas Filipino worker ukon OFW, indi sigon  nana masayuran ro anang obrahon kat uman nga mabalitaan nga ro anang misis nga sangka public school teacher hay nahumaling sa bagitong pulis.

Gin-prangka pa sigon nana ro anang misis, apang hugut nana raya nga ginpamalibaran.

Sa pihak kara, nataeupangdan sigon nana  nga  naging maeamig eon ro pagtrato kana it anang misis.

Ginasugid nga nauna eon nga nagkasaea ro misis apang nahimo nga patawaron it anang  mister  bangud sa pagpalangga.

-- ADVERTISEMENT --

Suno kana nga nagdesisyon imaw nga kasuhan ro  daywa  it adultery  agud nga depensahan ro anang kaugalingon ag mabo-oe kustodiya it anang unga nga naga-edad it an-um nga dag-on.

Samtang, nabulgar sigon ro relasyon it daywa matapos nga magpakilaea ro babaye nga imaw ro misis it nasambit nga police officer kat magreklamo raya it  pagpanakit  ukon  biktima it hazing it anang mga kabaro kun sa siin ro rekmao hay ginpasaka sa Napolcom  Region 6.

Nasayuran nga ro daywa hay nagrenta it  boarding house sa C. Laserna St., Kalibo  ag nagpakilaea bilang mag-asawa.

Owa sigon haeos it may naga istar sa andang ginpundar nga baeay sa banwa it banga  ag ro anang unga hay haeos nga nagbahoe sa baeay it anang yaya.

Ginsaysay it mister nga matapos ro masobra sa sang dag-on nga magkarelasyon hay nagdesisyon sanda nga magpakasae  ag makaron hay pitong dag-on eon kunta ro andang pagiging mag-asawa.

Ginapatihan nga mag-eowas sa criminal case hay posibleng magapangatubang ro daywa it  kasong administratibo  bangud nga pareho sanda nga  government employee  ag maging rason it pagpatalsik kanda sa serbisyo.