KALIBO, Aklan—Sa bisperas it Ati-atihan festival,  ginpaidaeum  it lokal nga gobyerno it Kalibo ro 14 diyas nga Surgical Enhanced Community Quarantine  ukon  SECQ  sa  Purok 2, 3 ag 4 sa C. Laserna Street, Kalibo nga nag-umpisa alas-12:01 kaina it aga-aga, Enero 16,  ag magatapos sa Enero 30.

Base sa ginpaguwa nga report it Municipal Health Office ukon MHO,  umpisa Enero 15 hay nakalista it 13 nga kumpirmadong  kaso it COVID-19 sa nasambit nga lugar kun  sa siin may pitong kaso sa Purok 2,  lima sa purok 4 ag sambilog sa purok 3 nga kaabuan hay may unknown exposure.

-- Advertising --

Bangud kara,   gin-rekomenda it barangay council it poblacion kalibo pinaagi sa barangay resolution no. 04 series of 2021  ro pagpatuman it SECQ agud nga malikawan ro mas pang pagkalhit it makamaeatay nga virus.

Ginklaru nga pilang baeay eamang it mga residente nga nakaangkon it covid 19 positive ro ginlockdown.

Mag-eowas kara, sa separadong barangay resolution no. 5 series of 2021 , magapatuman man it  mas temprano nga curfew hours  ag liquor ban sa bilog nga C laserna st kalibo.

Suno kay barangay kagawad Mark Sy,   imbes nga alas-9 it gabi-i hay pagahimuon raya nga alas-7 it gabi-i hasta it alas-5 it aga-aga.

Samtang, ginpasiguro it konseho nga magapadayun ro pagtau nanda it ayuda kaibahan ro LGU-kalibo  sa mga apektadong residente.


Aminado man ro opisyal nga gin-tiempo nanda ro lockdown agud nga malikawan ro pagpamiesta sa nasambit nga lugar nga makabig nga congested area.

Hugut man ro pagbantay it mga pulis ag barangay tanod ag nagbutang it outpost sa tanan nga mga entrance ag exit points paagto  sa C Laserna area.

Sa pihak nga parte, base sa report it Provincial Epidemiology Surveillance Unit it Provincial Health Office ukon  PHO aklan nga may petsang Enero 14,  2021,  naga-abot eon sa 535  ro mga nailistang kaso it COVID 19 sa bilog nga Aklan.//Sa nasambit nga numero, 14 ro bag-ong kaso, 70 ro actives cases ,   19 ro namatay  ag ro nabilin hay naka-recover eon.

Boses ni Kagawad Mark Sy it Brgy. Poblacion, Kalibo