Kalibo Aklan ——-Tanan eon nga tatlong Barangay  sa Isla it Boracay ro hilway eon halin  sa illegal nga droga bangud sa ginpabaskog nga kampanya it  Municipal Anti-Drug Abuse Council sa idaeum it lokal nga gobyerno it Malay ag Malay Municipal Police Station.

Suno sa Regional Oversight Committee, ro mga Barangay it Manocmanoc ag Balabag sa Isla ro pinaka-ulihi nga nadugang sa listahan it mga drug-free Barangays .

-- Advertising --

Nasayuran nga ko Pebrero 17 hay nauna eon nga nadeklarang drug free ro  Barangay Yapak .

Bangud kara,  ro tanan nga  17 nga  Barangay sa banwa nga ginaeakipan it tatlo  sa Boracay ag 14 sa mainland Malay hay  naeakip eon  sa “drug cleared barangay”  matapos nga nakasabat sa parameters  it committee  nga ginaeakipan it Department of Interior and Local Government, Philippine National Police, Department of Health, ag Philippine Drug Enforcement Agency (PDEA) nga nauna eon nga nagpatigayon it assessment.

Pila sa mga ginbasehan hay ro kawad-an it illegal nga droga  ag illegal drug transit, ag pagiging aktibo it barangay anti-illegal drug abuse council.

Bangud sa mga lockdown ag hugut nga quarantine measures bangud sa COVID-19 pandemic, natapna man ro paggamit ag pagbaligya it illegal nga droga .

Madumduman nga ko Enero 22,  2021 nakipagpueong si PDEA Director General Wilkins Villanueva kay Malay Acting Mayor Frolibar Bautista ag  Barangay Drug Clearing Program,  kun sa siin gintalakay ro angot sa pag-angkon it  drug-free tourist destination ag iba pang isyu nga may kaangtanan sa illegal nga droga.