KALIBO, Aklan—Owa eon it kabuhi kat masapwan ro sangka soltero matapos raya nga magbigti sa sueod it anang panimaeay sa Brgy. Tugas, Makato.

Suno kay Police Lieutenant Merriefin Carisosa, hepe it Makato Municipal Police Station nga ro mismong igkampod ag kapit-baeay it 26-anyos nga biktima ro nakakita kana nga nakabitay gamit ro sangka higot sa dingding it anang baeay.

Naga-isaeahanon eamang sigon raya nga naga-istar sa andang panimaeay ag nagatrabaho bilang sangka laborer.

Base sa pag-usisa it mga otoridad, owa it foul play nga natabo sa insidente.

Nagpamalibad eon man sigon ro pamilya nga ipaidaeom sa autopsy ro bangkay.

-- ADVERTISEMENT --

Ginasugid nga mahipuson nga klase it tawo ro biktima ag owa man it napabalita nga karelasyon.

Masami sigon raya nga may madaeom nga gina-isip apang owa man naga-istorya it anang problema.

Sa makaron, blangko pa ro pamilya sa motibo it pagbigti-patay it nasambit nga biktima.

Samtang kung may problema ka ag gusto mo it kaistorya, puwedi  kang tumawag sa National Center for Mental Health Crisis Hotline (NCMH-USAP) sa 0917-899-USAP (8727) ukon sa 7-989-USAP (8727).

Puwedi man nga magtawag sa  Hopeline PH 24/7 hotlines: 0917-558-4673 (Globe), 0918-873-4673 (Smart), 2919 (toll-free for Globe and TM).

Boses ni PLT Merriefin Carisosa