INTERNATIONAL News—Magapatigayun it simpleng pagdumdom ro mga pumueoyo it New York sa ika-20 anyos it terrorist attack.

Mag-eowas sa online activities hay may una man nga simpleng programa nga pagahimuon sa ginatawag nga ground zero.

-- Advertising --

Pagabisitahon ni US President Joe Biden ag First Lady Jill Biden ro tatlong lugar kung siin natabo ro pagpang-atake.

Sambilog kara ro World Trade Center sa New York City, Pentagon sa guwa it Washington DC ag sa Shanksville, Pennsylvania kung siin bumagbag ro United Airlines Flight 93.

Si Vice President Kamala Harris mat-a hay maga-adto sa Shanksville kaibahan si second gentleman Doug Emhoff antes paga-ibhan sanday Biden sa Pentagon.

Igapatigayun man sa 9/11 Memorial ag Museum ro seremonya kung siin pagabasahon ro pangaean ikt mga biktima ag magapatigayun it moment of silence bandang alas-8:25 it agahon sa Amerika ukon alas-8:25 it gabi-i makaron nga adlaw it Sabado oras sa Pilipinas.

Kaibahan man sa seremonya ro mga honor guards, bumber, kapulisan ag Port Authority Police Department.

Sangka private observance man ro paga-ubrahon it mga miyembro it pamilya it 40 katawo nga sakay it United Airlines Flight 93 sa National Memorial site maeapit sa Shanksville, Pennsylvania.

Pagkatapos bashon ro pangaean it mga namatay nga pasahero hay pagapatunugon nanda ro kampana.

Madumduman nga kapin sa 3,000 katawo ro namatay kat 19 nga al-Qaeda attackers ro nag-hijack sa ap-at nga commercial airplanes nga ro naging utak hay si Osama bin Laden.

Daywang eroplano nga American Airlines Flight 11 ag United Airlines Flight 175 ro sumalpok sa north ag south tower it World Trade Center samtang ro American Airlines Flight 77 hay bumagbag sa Pentagon.

Ginasugid nga ro mga pasahero it United Airlines Flight 93 hay nagsukoe  sa mga hijackers antes bumagbag ro eroplano sa kaeugtaan sa Shanksville, Pennsylvania nga target kunta kara nga bumagsak sa Washington.