KALIBO, Aklan—Sumaka pa sa 1,341 ro kabilugan nga kaso it Coronavirus Disease 2019 ukon COVID-19 nga nailista sa probinsya it Aklan umpisa nga magtuhaw ro pandemya.

Raya hay matapos nga makalista it 15 nga panibag-ong kumpirmadong kaso it COVID-19 ro Provincial Health Office (PHO)-Aklan kahapon, Abril 11.

-- Advertising --

Sa nasambit nga numero, ap-at ro maghalin sa banwa it Makato, tatlo sa Kalibo ag tig daywang kaso sa banwa it Banga, Ibajay, Malay ag New Washington.

Sa pihak nga parte, may 21 nga bag-ong nagmayad sa sakit nga umabot eon sa 1,140.

Sa makaron, 166 ro aktibong kaso it COVID-19 sa probinsya.

143 kara ro naka-facility quarantined, 17 ro admitted sa Aklan Provincial Hospital ag 6 ro naka-home quarantined.

Samtang, 35 ro namatay matapos nga dapuan it deadly virus.