Kalibo Aklan ————Natigayon eun nga naaresto ro sambilog sa tatlong ka mga suspek nga nagbuno-patay sa sangka 39 anyos nga  tricycle driver ko adlaw it Sabado, Nobyembre 27, sa Barangay Camanci Norte, Numancia.

Suno kay  Police Staff Sergeant Felizardo Navarra, Jr. it Numancia Pnp nga  kahapon kat nag-ako kanda ro sambilog sa mga suspek nga si alyas “ Jr.” 20 anyos, tumandok it  Imus, Cavite, apang presenteng naga-istar sa baeay it anang tiya sa Barangay Bulwang, Numancia.

Ginsaysay sigon ni alyas “Jr.”   nga  nasaksihan nana ro anang mga kaibahan samtang ginabuno ro biktimang si Wilfredo Peralta Tamayo, Jr., 39 anyos , tumandok it Barangay Mangan, Banga,  apang temporaryong naga-istar sa Purok 4, C. Laserna, Kalibo.

Ginapahayag nga nagsakay ro tatlong ka mga suspek sa tricycle  it biktimang si Tamayo mga bandang alas-7 it gabi-e sa may bahin it crossing Bulwang ag nagpahatod raya sa Barangay Camanci Norte agud nga magbo-oe it kaeabasa.

Sa owa it kung ano nga rason hay nagbugnot it anang siyaw  ro  sambilog sa mga suspek nga naka back ride ag gulpi eamang nga ginbuno ro biktima.

-- ADVERTISEMENT --

Gintinguhaan pa it biktima nga makadaeagan apang gin-eagas man raya it sambilog pa nga suspek rason  agud nga matumba raya sa karsada ag ko ulihi hay ginbawian gid it anang hueam nga kabuhi bangud sa mga naangkon nga fatal nga lastro sa kaeawasan.

Samtang ginpahayag dugang ni Pssgt. Navarra  nga owa sigon it kwarta mga pambayad sa andang pamasahe ro mga suspek rason nga andang ginpatay ro biktima.

Matapos ro  makangieidlis nga krimen hay andang gin-abandona ro tricycle it biktima sa  Sitio Pigado, Bakhaw Sur, Kalibo.

Sa makarun hay nagapabilin pa nga at large ro daywang ka mga suspek nga eaeaki nga naga edad 25 ag 30 anyos.