Natumod na gid sang Special Investigation Team (SIT) ang mga suspek nga nagpatay kay Claire Diergos.

Suno kay Police Senior Master Sergeant Francisco Lindero, Jr., spokesperson sang Iloilo Police Provincial Office (IPPO), indi magnubo sa tatlo ka persona ang ginalantaw nga pasakaan sang kaso-kriminal bangud sang “different levels of participation” sa amo nga krimen.

Nagbaskog pa ang ebidensya suno kay Lindero kasunod sang ginpasa nga findings sang Regional Anti-Cyber Crime Unit (RACU).

Ang RACU amo ang nangusisa sa dash camera sa salakyan, sa CCTV footages, kag sa laptop ni Claire.

Tanan ini ang may ‘evidentiary value’ suno sa IPPO spokesperson.

-- Web Ads --

“Yes, natumod na sila sang aton nga SIT. Actually, natumod na sila nga daan, but ining mga na-gather ukon findings sang RACU nag-strengthen, nagpabaskog, nagpabug-at sa mga ebidensya batok sa mga persons of interest nga sa nasiling ko na gani, indi magnubo sa tatlo. Amo na kadamo ang naghikot para mapatay si Claire Diergos,” suno kay Lindero.

ANGGULO

Halin sa apat ka anggulo, nagnubo sa duha ang ginasundan sang SIT, apang nagpamalibad na ang IPPO nga ibuyagyag kun ano ang gindula nga anggulo kag kun ano ang padayon nga ginasundan.

Ini agud, suno sa IPPO spokesperson, ‘malikawan nga mapurnada ang imbestigasyon.’

Kun balik-balikan, ang apat ka anggulo nga gintutukan anay sang mga pulis amo ang crime of passion, utang, hatred, kag robbery with homicide.

PERSONS OF INTEREST

Sa ‘indi magnubo nga tatlo ka persons of interest’ nga amo subong ang ginatutukan sang mga pulis, ginkumpirma sang pulis nga yara na nga daan sila sa mga ginsundan ‘from the very beginning’ sang imbestigasyon.

BACKGROUND

Oktubre 26 sang nasapwan ang bangkay ni Claire sa sulod mismo sang iya salakyan nga gin-park sa Barangay Inangayan, Sta. Barbara, Iloilo.

Sunod nga na-establish nga sa balay sang biktima sa Deca Homes Subidvision sa Pavia, Iloilo ginkomiter ang krimen.

Wala sang direct eye witness sa krimen, apang may mga natipon nga circumstantial evidences kag nag-corroborate ang dugang nga findings sang RACU.

Una na nga ginpahayag nga operational ang dash cam sa salakyan sang biktima.

Padayon ang pasalig sang pulis nga ma–file ang kaso batok sa mga suspek kag mahatag ang nagakaigu nga hustisya. ##

Facebook Comments

bomboradyo