ILOILO CITY- Sapulon ni Iloilo City Councilor Ely Estante, chairman sang Committee on Markets and Slaughterhouse , ang tanan nga markets-in-charge sa syudad, upod sa Local Economic and Enterprise Office, agud istoryahan kon paano mabuligan ang mga non-essential establishments nga ginpasirado bangod sa Modified Enhanced Community Quarantine status sang syudad.

Sa interview sang Bombo Radyo kay Estante, iya ginpahayag nga isa sa ginalantaw niya nga maayo nga himuon sang iya kumitiba amo nga irekomendar nga i-delay anay ang pagsukot sa balaydan sa nasambit nga mga establishments kaangay sang ila arkila kag iban pa, ukon tugutan lang ang staggered payment agud nga indi man sila matam-an ilabi nga wala man sila sang kita.

Suno kay Estante, sa tion nga ila na ini maistoryahan kag makadihon sang rekomendasyon ang Local Economic and Enterprise Office, gilayon naman nila ini ipasa sa City Treasurer’s Office agud ipaaprubahan ini.

Sa subong, ginmanduan na ni Estante ang tagsa ka market-in-charge nga magpatigayon sang inventory para sa profiling sang mga nagsirado nga negosyo agud magamit nga basehan sa patigayunon nga meeting sa masunod nga semana,Lunes nga adlaw.

Nahibaluan nga sa data sang LEEO, kapin 100 ka non-essential establishments ang ginpasirado sa pito ka mga public markets sa Iloilo City.

Facebook Comments

bomboradyo