Gina-sekreto sa gihapon ni Davao City Mayor Sara Duterte-Carpio kun ano ang iya masunod nga plano ukon kun ano nga posisyon sa national nga lebel ang iya padalaganan kasunod sang iya pag-withdraw sang iya Certificate of Candidacy (COC) para sa pagpa-eleher liwat bilang alkalde.

Ang katapusan nga mensahe sang alkalde amo gihapon ang naka-post sa iya Facebook page kag ang pahayag nga ang iya utod nga si Vice Mayor Sebastian Duterte amo ang magabulos nga magpadalagan sa pagka-alkalde sa syudad sang Davao.

Labi nga nagtunog ang espekulasyon nga magasaka si Sara sa national post, apisar nga makapila ka beses naman niya nga gin-athag nga wala siya sang plano sa national position kag wala sang plano nga magsulod sa ruling party nga PDP-Laban nga amo ang partido sang iya amay nga si Presidente Rodrigo Duterte.

MA-MISS KA NAMO MAYOR INDAY”

Viral subong online ang video kag pictures ni Sara nga nagahibi samtang kaupod ang mga empleyado sa Davao City Hall.

-- Web Ads --

Ginasiling sang mga empleyado nga hidlawon sila sa amo nga alkalde.

MEETING SA IBAN NGA PRESIDENTIAL ASPIRANTS

Antes sang iya desisyon nga mag-isol sa pagpadalagan sa pagka-alkalde, matandaan nga nagpakigkita man si Sara sa duha ka presidential aspirants — sanday former Sen. Bongbong Marcos kag Sen. Bato dela Rosa.

Wala sang detalye nga ginhatag kun ano ang naistoryahan sa ila meetings, apang suno kay Dela Rosa, gin-remind niya si Sara nga nagahilapit na ang Nobyembre 15 nga amo ang deadline sang subsitution kag sang wiithdrawal.

MABULOS KAY BONG GO?

Labi man nga nagtunog ang huring-huring nga posible si Sara ang magabulos kay vice presidential aspirant Senator Bong Go nga amo ang una nga ginsiling sang PDP-Laban nga magpadalagan bilang vice president.

Si Dela Rosa ang standard bearer sang amo nga grupo.

Sa iya mensahe kahapon sa isa ka event sa Antipolo City, emosyonal si Go nga naghatag sang clues nga may mga pagbag-o sa iya plano sa eleksyon kasunod sang wishes ni Presidente Duterte.

“Itong kandidatura ko bilang bise presidente ay maaaring magbago. Gustuhin ko man magsilbi sa inyo bilang bise presidente, pero sa kagustuhan ng ating mahal na Pangulo, kailangan ko pong umiwas,” suno kay Go.

Nahibaluan nga tubtub Nobyembre 15 ang substitution of candidates sa calendar sang Comelec. Allowed ang substitution kun mapatay ang kandidato, mag-withdraws, ukon ma-disqualify.

Sang 2015, natabo na ini sang gin-withdraw ni Duterte ang iya reelection bid para pagka-Davao City mayor kag nangin substitute presidential candidate sang PDP-Laban. #

Facebook Comments

bomboradyo