ILOILO CITY– Mahimo nga arestuhon apisar nga wala sang warrant ang mga tawo sa likod sang double your money investment scams kaangay sang Chiyuto Double Your Money Scheme kag iban pa nga nga kompaniya nga nagatanyag sang kasubong nga schemes.

Sa interview sang Bombo Radyo kay Senate Minority Leader Franklin Drilon, iya ginpahayag nga ini nga sahi sang iligal nga buluhaton ang makabig nga continuing crime gani mahimo nga magpatigayon sang warrantless arrest.

Suno kay Drilon, maathag man nga ginlapas sang sini nga double your money investment scheme ang revised corporation code, revised penal code kag ang securities code bangud mismo ang Securities and Exchange Commission ang nagpamat-ud nga wala ini sang lisensya para nga magsolicit sang kwarta gikan sa mga tawo.

Dugang pa sang Ilonggo senator, apisar may registration sa Department of Trade and Industry ini nga mga investment schemes, indi ini bastante nga dokumento.

Mahimo naman nga mapasakaan sang kaso nga syndicated estafa ang mga tawo sa likod sini ilabi na ang mga aktibo nga nagapang-solicit sang kwarta.

Paathag pa sang natungdan, bisan isa lang ka affidavit, mahimo na nga makapasaka sang kaso.

Posible nga mapamatbatan sang silot nga life imprisonment ang mapamatud-an nga guilty.

Facebook Comments

bomboradyo