ILOILO CITY- Naeksperyensiyahan ang pila ka mga problema sa mga border control points sa una nga adlaw sang pagpatuman sang hard lockdown sa Iloilo City.

Sa interview sang Bombo Radyo kay PLt. Dennis Losbañes , team leader sa quarantine control point sa Tagbak, Jaro, Iloilo City, iya ginpahayag nga may pila ka mga menor de edad nga pasahero sang mga Public Utility Jeepney( PUJ) nga magasulod kuntani sa syudad ang ginpapauli na lang.

Suno sa iya, may mga PUJ man nga wala nagasunod sa 50% passenger capacity gani ginpapanaog gid ang sobra nga mga pasahero.

Sa bahin naman sang border control point sa Mohon, Arevalo, Iloilo City, naglab-ot sa masobra tunga sa kilometro ang pagpugok sang trapiko.

Sa interview sang Bombo Radyo kay PLt. Aladdin Talaban, team leader sa area, iya ginpahayag nga ini bangod nga ginaid-idan gid nila ang pagcheck sa mga tawo kon essential ang ila tinutuyo sa pagpadulong sa syudad.

Nahibaluan nga ang mahimo lang makasulod sa syudad amo nga mga tawo nga ang ila katuyuan amo ang trabaho, medical needs, pag-access sang government services,byahe sang goods ukon construction materials, humanitarian purposes, pagpabakuna sang COVID-19 vaccine.

Exempted man ang mga Returning Overseas Filipino workers, Returning Iloilo City residents kag Authorized Persons Outside of Residence;residents sang Iloilo Province kag Guimaras Province.

Facebook Comments

bomboradyo