ILOILO – Pagtanum sang kahoy ang ginalantaw nga long-term solution sang Iloilo Provincial Government sa lapnagon nga pagbaha sa probinsya kun magbubo ang mamunog nga ulan.

Sa interview sang Bombo Radyo kay Iloilo Governor Arthur Defensor Jr., iya ginpahayag nga ini ang ginaumpisahan na paagi sa programa nga Tanum Iloilo.

Ang Tanum Iloilo ang initiative sang provincial government paagi sa Provincial Environment and Natural Resources Office para sa conservation, protection kag preservation sang palibot kag agud mabatuan ang epekto sang climate change.

Target sini nga programa nga makapatubo sang 1.5 million nga native kag fruit-bearing trees sa probinsya subong nga tuig.

Iga-implementar man suno kay Defensor ang contour cultivation agud kaangay sa rice ukon corn terraces ang makit-an sa masunod nga henerasyon.

Matandaan nga sang Disyembre 2, nalubog sa tubig-baha ang pila ka bahin sang probinsya kag ang pinakaapektado amo ang banwa sang San Enrique nga may yara pa sang naanod nga balay.

May pagbaha man sa banwa sang Ajuy, Sara, Banate, Batad, Bingawan, kag San Dionisio kag ginatudlo sang mga residente nga nabahaan ilabi na sa banwa sang San Enrique ang pagkakalbo sang mga kabukiran nga amo ang rason sang lapnagon nga pagbaha.

Facebook Comments

bomboradyo