ILOILO CITY- Ang Olympics, isa ka event nga ginabantayan bangod nagatililipon diri ang pinakasagad nga mga atleta sa bilog nga kalibutan, ini ang rason kon ngaa ginbansagan ini nga greatest show on Earth.

Sa kapin isa ka siglo nga maragtas sang Olympiada, nasaksihan ang paghimo sang world records kag may yara man sang mga tradisyon nga ang mga atleta mismo ang nag-umpisa.

Sang nagligad lang nga adlaw, isa ka tradisyon ang nasaksihan sang mga tumalan-aw.

Matapos ang men’s singles badminton final, si Viktor Axelsen sang Denmark ang nagbaylo sang iya jersey kay Chen Long sang China bilang pagpakita sang pagtahod sa iya kasumpong.

Si Axelsen amo ang gold medalist sang iya ginpierde si Long nga amo naman ang nag-uyat sang titulo sang 2016 sa Rio Olympics.

Ini nga tradisyon ang nagsugod sang 2016 sang ang Malaysian badminton star nga si Lee Chong Wei kag ang double Olympic champion sang China nga si Lin Din, ang nag- swap sang ila bayo sa men’s singles semi-final sa Rio.

Matapos ang ila hampang, sila ang naghaksanay kag nagbayluhanay sang ila jerseys bilang pagpakita sang ila respeto sa isa kag isa.

Facebook Comments

bomboradyo