Magatakop na karon sa gab-i ang halos duha ka semana nga Tokyo 2020 Paralympics sa diin nagpasundayag ang mga atleta nga may kasablagan sa lawas halin sa nanuhay-tuhay nga bahin sang kalibutan apisar sang pagpanghangkat nga dala sang COVID-19.

Suno kay Bombo Samurai International Correspondent Josel Palma, direkta sa Japan, patigayunon ang closing ceremony sa National Stadium umpisa las 7:00 – 9:30 pm (oras sa Pilipinas).

“Harmonious Cacophony” ang mangin konsepto sang Closing Ceremony.

Ini nga konsepto ang nagakilala sang unity ukon pag-isa sang kada indibidwal sa pihak sang ila differences ukon kinalain.

Patigayunon ang seremonya nga wala sang audience, sa diin ang magatambong lang amo ang pila ka mga opisyal nga ginalakipan nanday Japanese Crown Prince Fumihito kag Tokyo Governor Yuriko Koike.

-- Web Ads --

Nahibaluan nga 4,400 ka mga atleta halin sa 162 ka pungsod kag rehiyon, ang naghampang sa Paralympics halin sang Agusto 24.

Lakip man sa mga atleta nga nagpasundayag amo ang duha ka Afghan national nga gin-evacuate halin sa Afghanistan — pungsod nga subong ginasakop na sang Taliban militants.

Bangud sa multinational effort, ”safe” nga na-evacuate ang duha ka atleta padulong sa Tokyo agud matiglawas ang ila nga pungsod.

Matandaan nga madamo ang nagprotesta bangud sa pihak sang nagataas nga kaso sang COVID-19 sa Japan, nadayon ang pag-host sang pungsod sang Olympic kag Paralympic games.

Agud malikawan ang paglapta sang virus, ginmanduan ang kada delegasyon kag foreign participants nga istrikto nga magtinir lang sa athletes’ village kag sports venues kun kinahanglan, kag sa tion nga matapos ang final events nga ginpasakupan sang mga atleta, gina-require man ang mga ini nga magbalik gilayon sa ila tagsa ka pungsod.

Facebook Comments

bomboradyo