ILOILO – Balikan sang Iloilo Provincial Government ang na-draft na nga executive order kun sa diin imandu nga ipatuman gihapon ang COVID-19 testing para sa mga local travelers ukon sa returning residents nga halin sa mga lugar nga may mataas nga kaso sang COVID-19 kag lapnagon nga COVID-19 transmission.

Sa interview sang Bombo Radyo kay Iloilo Governor Arthur Defensor Jr., iya ginpahayag nga paagi gihapon ini sang probinsya sang Iloilo agud nga mapunggan ang pagtimbuok sang coronavirus cases sa mga banwa sa probinsya.

Ini ang pahayag sang gobernador apisar gin-aprubahan sang National Inter-Agency Task Force ang unified travel protocols para sa tanan nga local government units kun sa diin, sa idalom sang bag-o nga pagsulundan, indi na mandatory sa local travelers ang pagpaidalom sa COVID-19 testing kag quarantine.

Sa idalom sang amo nga IATF Resolution No. 101, dapat lang magpaidalom sa COVID-19 testing ang domestic traveler KUN gina-require ini sang LGU of destination – sang provincial government, sang otoridad sa highly urbanized cities kagn sang independent component cities.

Suno kay Defensor, dapat may protocol gihapon nga sundon agud indi man mapuhag ang mga barangay sa probinsya kun may isa ka tawo nga maghalin sa lugar nga may lapuyot nga transmission sang COVID-19.

Sa subong, wala pa sang ideya si Defensor kun ano ang panindugan sang iban nga LGUs sa Western Visayas.

Sa syudad sang Iloilo, una naman nagpahayag si Iloilo City Mayor Jerry Treñas nga maga-comply ang Iloilo City Government sa bag-o nga pagsulundan sang National IATF bangud manageable pa man ang COVID-19 cases sa syudad.

Facebook Comments

bomboradyo