“Sin-o ang gin-biktima ko? Sin-o ang gin-terrorize ko bilang aktibista? Wala ako sang liwan nga gin-terrorize kundi ang pulitiko nga kurap kag ang mga tawo sa gobyerno nga wala nagatrabaho sang husto!”

Hugot ang panindugan sang deputy spokesperson sang Bayan-Panay nga si Bryan Bosque nga indi siya kabahin sang rebelde nga grupo — baliskad sa gin-imprinta sa mga tarpaulin nga amo ang ginpalapta sa syudad sang Iloilo.

Ang ginatumod nga tarpaulins ang nagaunod sang pangalan sang pila ka Ilonggo activists nga ginapahayag mga katapo sang Communist Party of the Philippines–New People’s Army–National Democratic Front (CPP-NPA-NDF).

Lakip sa nalista nga mga pangalan amo si Bosque.

Ang ginpanglista nga pangalan ang ginapahayag eligible para sa E-CLIP ukon Enhanced Comprehensive Local Integration Program — ang flagship program sang Duterte administration agud makabalik sa sabak sang gobyerno ang anay katapo sang CPP-NPA-NDF kag Militia ng Bayan.

“Naalarma kita liwat sa panibag-o nga round sang red tagging kag pag-akusar nga myembro kami sang CPP-NDF,” pahayag pa ni Bosque. Ini bangud suno sa iya, kalabanan sang ila mga upod nga ginpatay sang nagligad nga mga tuig, nakaeksperyensya sang pagpangredtag. Partikular nga gintumod nga kaso amo ang Iloilo regional coordinator sang Bayanmuna nga si Jory Porquia nga ginluthang-patay sang Abril 30 sang nagligad nga tuig. Tubtob subong, wala nasolbar ang kaso.

Nagapati si Bosque nga ‘kun indi pulis kag militar, National Task Force to End Local Communist Armed Conflict (NTF-ELCAC) ang may kahimuan sa pagpalapta sang mga posters’.

“Indi lang malisyoso kundi threat sa amon kabuhi nga ginhimo sang mga talawit ukon talawan nga mga tawo nga may tuyo nga pahipuson kami. Gusto nila nga mapalayo kami sa issues nga ginabitbit namon,” dugang pa sang natungdan.

Ginhangkat pa ni Bosque ang sin-o man nga nagpangtapik sang tarpaulin nga kun matuod ang ila nga claims, maggwa sila sa publiko kag pamatud-an ang akusasyon kag untatan na ang pagpanago sa likod sang ‘non-existent’ nga Western Visayas Alliance of Victims of CPP-NPA-NDF.

PHOTO: BRYAN BOSQUE/FACEBOOK

CONSISTENT RED-TAGGING, BUT…

Una nga nainterview sang Bombo Radyo ang self-confessed former rebel nga si Jeffrey Celiz aka Ka Eric Almendras nga nagpahayag nga kaupod nila sang una sa hublag ang mga pangalan nga yara sa tarpaulin nga nagalapta sa syudad sang Iloilo.

Suno naman kay Bosque, daw kaangay nga bangud sang mga pahayag nga ginbuy-an ni Celiz, daw kaangay lang nga gin-affirm niya nga sila mismo ang nagpalapta sang mga posters.

“Wala ni siya kakilala sa akon. Gusto ya abi paggwaon nga all-knowing siya…nga kilala ya tanan kag para majustify ang attacks sa amon. Gina-affirm ya ang pagpati namon nga sila ukon ang NTF-ELCAC ang may padihot sa redtagging sa amon,” sabat ni Bosque.

Nagaapelar si Bosque sa lokal nga gobyerno kag sa Iloilo City Police Office (ICPO) nga imbestigaran ini nga makaalarma nga insidente sang redtagging. “Indi naton paghulaton nga madamo nga human rights defenders ang madula sa aton nga syudad.”

Sa isa ka separado nga Facebook post, ginpahayag man ni Bosque nga padayunon nila ang pagtindog para sa tawhanon nga kinamatarong apisar sang mga pamahog nga nabaton. “The people, tired of all these incompetence seek for accountability. And despite the threats, we will take the streets.” #

***Sa ngalan sang patas nga pagwaragwag, bukas ang Bombo Radyo Iloilo sa paathag/sabat sang otoridad kag mga nadalalahig nga mga pangalan.

Facebook Comments

bomboradyo