Gin-ako sang nobyo nga siya ang nagpatay sa iya nga nobya nga 17 anyos nga dalagita nga tul-an na sang nasapwan sa Barangay San Nicolas, Buenavista, Guimaras.

Photo from Buenavista MPS, Guimaras

Ang suspek amo si Alexander Canonigo, 21, residente sang nasambit man nga barangay.

Sa interview sang Bombo Radyo kay Police Corporal Freddie Jallores, imbestigador sang Buenavista Municipal Police Station, iya ginpahayag nga Marso 10 sang nag-inaway kag nagbaisay sanday Canonigo kag alyas Marie bangud luyag na sang dalagita nga magbulag sa iya nobyo.

Apang bangud indi gusto sang lalaki suno kay Corporal Jallores, ginkaptan ni Canonigo sang patalikod ang dalagita kag mahimo bangud sa hugot nga pagkupo, nadulaan sang animo si Marie kag nagpalaggit-om.

Sa pagdumdom nga napatay sini ang iya nobya, ginsulod ni Canonigo sa sako si Marie kag gindala sa maligwin nga lugar kag didto ginlubong ang dalagita.

-- Web Ads --

Pahayag sang pulis, lipak lang ang gingamit sang suspek sa pagkutkot sang duta kag indi man ini tuman gid ka dalom.

Gintuad man sang imbestigasdor nga base sa nobyo, apat ka tuig man ang ila nga relasyon ni Marie.

Sa subong, indi pa mapat-od ni Corporal Jallores kun may yara sang pagpanghimulos nga natabo.

Marso 10 katapusan nga nakit-an ang dalagita kag Agosto 12 na gin-report sa police nga missing.

Nahibaluan nga sang Oktubre 13 sang nakit-an sang mga ati nga nagapang-ayam sang halu ang mga tul-an sang dalagita apang Oktubre 16 na sang nahibaluan sang mga barangay officials.

Facebook Comments

bomboradyo