ILOILO CITY-Amat- amat na nga naganubo ang numero sang ginaihaw nga baboy sa Iloilo City Slaughterhouse.

Sa interview sang Bombo Radyo kay Simplicio Subaldo, Executive Assistant for Local Economic Enterprise, iya ginpahayag nga nabudlayan na mangita ang mga supplier nga nagadala sang baboy nga amo ang ginaihaw sa slaughter house.

Suno kay Subaldo, kon sadto, indi magnubo sa 300 ka mga baboy ang ginaihaw sa isa ka adlaw apang subong, yara na lang ini sa 260 tubtob 270.

Pahayag ni Subaldo, ini ang resulta sang pagsuplay sang Iloilo sang baboy sa iban nga rehiyon kon sa diin indi naman mahimo nga magpasulod sang baboy gikan sa iban nga rehiyon bangod sa pagpamahog sang African Swine Fever.

Dugang ni Subaldo, mas ginapili sang mga nagasagod sang baboy nga ibaligya ang ila sapat sa mga manugbakal sang baboy agud i-supply sa iban nga rehiyon bangud sa mas mahal nga presyo kag mas dako ang ila maginansya kun ipaanggid sa presyuhanay sa Iloilo.

Nagpangabay naman ini nga kon mahimo, untaton anay ang pagsuplay sang baboy sa gwa sang rehiyon 6 agud indi man maapektuhan ang suplay sa Western Visayas.

Facebook Comments

bomboradyo