Nagpatigayon sang pagsinapol ang Committee on Appropriations sang Sangguniang Panlalawigan upod ang talatapan sang Provincial Administrator, Local Finance Committee kag Provincial Legal Office agud istoryahan ang tuhoy sa wala gihapon mapasar nga 2019 annual budget sa probinsiya sang Iloilo.

Sa interview sang Bombo Radyo Iloilo kay Provincial administator Atty. Suzette Mamon, iya ginpahayag nga sa nasambit nga pagsinapol gindetalye ang kaundan sang 2019 budget.

Suno kay Mamon, wala gin-imbitar ang mga chiefs sang mga departamento bangud wala man gin-istoryahan ang natuhoy sa pag-itemize sang mga proyekto sa idalom sang 20% development fund sang probinsiya.

Nahibaluan nga ang kapaslawan sang mga departamento sa kapitolyo nga magpasa sang itemized nga mga proyekto nga pagagamitan sang pondo gikan sa 20% development fund nga amo ang gina-require sang Commission on Audit ang ginatudlo rason kun ngaa wala sa gihapon mapasar ang annual budget sang probinsiya.

Ginpahayag naman ni Mamon nga bangud wala mapasar ang budget kag reenacted budget lang ang ginagamit subong, limitado lang ang pagpagwa sang pondo sang kapitolyo para sa mga proyekto sa kabarangayan kag mangin sa mga social services.

Samtang, ginkakibot naman ni Mamon nga siya sa gihapon ang ginpahayag pilion bilang Provincial Administrator sa idalom sang administrasyon ni incoming Iloilo Governor Arthur Defensor Jr.

Facebook Comments

bomboradyo