Halos indi na makilal-an pa ang senior citizen nga makaduha ka beses nga naligsa sang 10 wheeler wing van sa Barangay Culasi, Ajuy, Iloilo.

Ang biktima amo si Victor Catalan, 71 anyos kag residente sang nasambit nga barangay.

Sa interview sang Bombo Radyo kay PLt. Danilo Noca, hepe sang Ajuy Municipal Police Station, iya ginpahayag nga nagapasaka sa elevated nga portion sang dalan ang driver sang 10 wheeler wing van nga si Jonel Catmiyo Jr. , 33 anyos, residente sang Hinigaran, Negros Occidental.

Halin sa Barotac Viejo, Iloilo ang driver kag padulong kuntani sa Roxas City, Capiz karga ang 25 ka tonelada nga mais.

Apang samtang nagapasaka ini, na overheat ang iya salakyan kag nagpondo sa kilid sang dalan.

Gintinguhaan niya liwat nga magkambya pasaka apang nag uy-oy kag nag-atras ang 10 wheeler wing van nga natabuan man nga yara sa likod ang biktima nga nagalakat.

Nabungguan si Catalan, natumba kag natapakan sang wing van apang liwat pa nga nag-atras ang driver nga si Catmiyo kag natapakan naman sang panguna nga bahin sang wing van.

Suno kay Noca, wala natalupangdan sang driver nga may yara na siya sang nabungguan rason nga liwat ini nag-atras.

Apang sang dalayon nga atras sang wing van, nakibot na lamang si Catmiyo nga may yara na sang nagahuray-ad sa dalan kag duguon.

Nanaog siya sa wing van kag nagpangayo sang bulig sa mga panimalay sa lugar.

Pahayag sang hepe, daw kaangay nga napud-pod ang lawas sang biktima bangud sa makapila ka beses nga pagtapak sa iya sang wing van.

Sa subong, yara na sa kustodiya sang Ajuy Municipal Police Station ang driver sang wing van.

Facebook Comments

bomboradyo