ILOILO CITY- Gin-umpisahan na sang Philippine Red Cross ang pagpatigayon sang saliva testing para sa COVID-19.

Sa interview sang Bombo Radyo kay Dr. Pauline Ubial, anay Department of Health Secretary kag sa subong head sang molecular laboratory sang Philippine Red Cross, iya ginpahayag nga ini ang mas madasig kag mas barato nga pamaagi agud ma-detect ang infection.

Suno kay Ubial, magapatigayon ang ahensya sang 1,000 saliva test sa diin ang resulta sini ang ipasa sa Department of Health (DOH) bilang kabahin sang requirements para sa approval sini.

Ginpahayag niya nga kinahanglan man sang approval sang Food and Drug Administration antes nga pasangkaron ang saliva testing.

Suno pa kay Ubial, ang turnaround time sang saliva testing ang mas manubo sa 12 oras kag mas madasig sa swab tests nga nagadugay sang 24 oras antes mapagwa ang resulta.

Ang saliva test ang ginalauman nga magapamag-an sang pinansyal nga palas-anon sang Philippine Health Insurance Corp. (PhilHealth), nga nagabayad sa Red Cross para sa swab tests sang members sini sa diin nagabalor lang ini sang P2,000, kag halos katunga sang presyo sang isa ka swab test.

Facebook Comments

bomboradyo