ILOILO CITY- Ginbalik ni Iloilo City Councilor Ed Peñaredondo ang Mistubishi Strada nga ginhatag ni Iloilo City Mayor Jerry Treñas.

Sa interview sang Bombo Radyo kay Councilor Peñaredondo, iya ginpahayag nga indi niya ini kinahanglan bangud may duha na siya ka mga salakyan.

Suno sa konsehal, mariit man ang amo nga salakyan bangud may logo sang Iloilo City gani mainit sa mata sang publiko kag madali nga mahatagan sang malisya.

Pahayag niya, mas maayo kon ibalik niya ini sa syudad agud mapuslan pa sang iban nga opisina.

Tuyo naman sang natungdan nga ihatag ini kay City Engineer Salvador Pedregosa agud nga magamit niya sa paglibot sa syudad agud malantaw ang development sang mga proyekto.

Gin-athag naman ni Peñaredondo nga may appropriation ordinance sa pagbakal sang nasambit nga mga salakyan.

Nahibaluan nga 13 tanan ka mga Mitsubishi Strada ang ginbakal nga ipanagtag kuntani sa mga opisyal nga nagabug-os sang Iloilo City Council.

Gindepensahan naman ni Vice Mayor Jeffrey Ganzon ang tikang ni Iloilo City Mayor Jerry Treñas nga paghatag sang Mitsubishi Strada sa mga konsehal.

Sa interview sang Bombo Radyo kay Ganzon, iya ginpahayag nga wala dapat ginahatagan ini sang malisya bangod madugay na ini nga promisa ni Treñas antes pa man nag-abot ang pandemya.

Suno sa opisyal, nag-agi man ini sa husto nga proseso kag public bidding.

Dugang pa niya, makabulig man ini agud nga mas mangin respetado ang imahe sang mga konsehal kon may yara sila sang disente nga salakyan bangud ang iban sa ila sadto ang naga-commute lang.

Sa subong,wala pa nabaton ni Ganzon ang nasambit nga salakyan.

Facebook Comments

bomboradyo