Nadugangan pa gid ang mga nagkalamatay nga inosente nga mga sibilyan kag dugang nga ginatos ang nagkalapilasan kasunod sang missile strikes sa eastern city sang Kharkiv nga puluy-an sang 1.4 million ka mga tawo.
Ini nga pagpang-atake ang nagdungan sa ginpatigayon nga peace talks sa tunga sang Russia kag Ukraine sa Belarusian border.
Suno kay Ukrainian Interior Ministry adviser Anton Herashchenko, ginabanta 11 mga tawo ang dugang nga napatay.
Gilayon naman nga nagmando si Ukrainian president Volodymyr Zelensky sang ”immediate ceasefire” kag ginhingyo ang tanan nga Russian troops nga maglayas na sa Ukraine.
Gin-akusahan naman sang State Department ang Russia sa ila ginhimo nga human rights abuses matapos ginwasak sang Russian troops ang pila ka mga buluthuan, ospital, radio stations, kag puluy-an, kag linibo na ang nagkalamatay nga sibiliyan nga ginalakipan sang mga kabataan.
Nahibaluan nga naghuyhuy lang ang abaga sang mga opisyal sang Ukraine matapos ang peace talks nila sang Russia sa Ukraine-Belarus border.
Ini matapos nagpakatig-a sa gihapon si Russian President Vladimir Putin nga makig-areglo sa Ukraine.
Samtang nag-anunsiyo naman ang European Union members sang bag-o nga mga sanctions batok sa Russia kag ginpasiguro sa Ukraine ang dugang nga military support sa masunod nga mga inadlaw.
Facebook Comments