ILOILO – Temporaryo nga ginpasarado ang Rural Health Unit (RHU) sang Oton, Iloilo.

Ini matapos nagpositibo sa COVID-19 ang isa ka health personnel.

Sa interview sang Bombo Radyo kay Jafet Salinas, COVID-19 focal person sang Oton, Iloilo, iya ginpahayag nga regular nga nagapatigayon sang swab test ang RHU sa ila mga empleyado kag may naggwa nga isa ka medical personnel nga nagpositibo sa COVID-19.

Suno kay Salinas, apisar isa lamang ang nagpositibo, indi mahimo nga mangin kampante ang RHU agud nga malikawan ang paglapta sang virus.

Ginpahayag ni Salinas nga tubtob sa Dominggo nga adlaw, Enero 24, ang temporary lockdown sang talatapan.

Katuyuan sini nga mapaidalum sa total disinfection ang bug-os nga RHU.

Dugang pa ni Salinas, ikaduha na ini nga kahigayunan nga ipasirado ang RHU bangud sa pagpositibo sang empleyado sa nasambit nga virus.

Nagapasalamat man ang natungdan sa Local Government Unit sang Oton bangud sa gilayon nga pagtamod sa sitwasyon.

Facebook Comments

bomboradyo